Захирал Л.Жаргалсайхан тэргүүтэй тус хүрээлэнгийн эрдмийн зөвлөлийн гишүүд БНХАУ-ын ӨМӨЗО-ны Бугат, Хөх хотод 2023 оны 6 дугаар сарын 25-аас 7 дугаар сарын 1-ний өдрүүдэд албан томилолтоор ажиллалаа. Томилолтын хүрээнд Эрдэс боловсруулалтын “Нэг бүс-Нэг зам” хамтарсан лаборатори байгуулах төслийн нээлтийн үйл ажиллагаанд оролцож, Монгол орны эрдэс хүдрийг боловсруулах химийн технологийн судалгааны үр дүнгээр холбогдох илтгэлүүдийг тавив.

Төлөөлөгчид хоёр талын хамтын ажиллагааг гүнзгийрүүлж, хамтран ажиллах боломжит судалгааны чиглэлийг өргөжүүлэх зорилгоор Өвөр Монголын Аж үйлдвэрийн их сургуулийн Нүүрсний хийжүүлэлт-инженерийн лаборатори, Нүүрсний хаягдлыг дахин боловсруулах цөм лаборатори, Багшийн их сургуулийн Функциональ материалын физик химийн цөм лаборатори, Тариалангийн их сургуулийн хүнс судлал-инженерчлэлийн лабораториудтай танилцаж, дээрх байгууллагуудын эрдэмтэн судлаачидтай уулзаж ярилцлаа. Улмаар Бугат хотын Газрын ховор элементийн судалгааны хүрээлэнд зочилж, дэд захирал Ван Чи Вэй болон албаны бусад хүмүүстэй хамтарсан лаборатори байгуулах төслийн хүрээнд хийгдэх ажлын талаар санал солилцов.

Түүнчлэн Хятадын хойд бүсэд үйл ажиллагаа явуулж буй Өвөр Монголын Jiutai Energy Group-ээр зочлон нүүрсийг хийжүүлэн метанол үйлдвэрлэх процесс болоод завсрын бүтээгдэхүүн болох синтетик полимер материалын үйлдвэрлэлтэй танилцан мэдээлэл авсан байна.