Монгол Улс-БНХАУ-ын хамтарсан “Эрдэс түүхий эдийн боловсруулалтын
лаборатори” ШУА-ийн Хими,
химийн технологийн хүрээлэн дээр байгууллагдлаа.
Уг лабораторийн нээлтэд БНХАУ-ын талаас
Шинжлэх ухаан, технологийн яам, ӨМӨЗО-ны
Шинжлэх ухаан, технологийн тэнхим, Хөххотын Металлургийн хүрээлэн, Монголын талаас
БСШУСЯ, ШУА, Хими, химийн технологийн хүрээлэнгийн төлөөлөл оролцож, БНХАУ-ын Шинжлэх
ухаан, технологийн яамны Олон улсын хамтын ажиллагааны газрын дарга Руан Шианг
Пинг, Монгол улсын БСШУСЯ-ны Шинжлэх ухаан, технологийн бодлогын газрын дарга Ж.Мөнхбат
нар нээж үг хэлэв.
Энэхүү лабораторийг БНХАУ-ын ӨМӨЗО-ны
санхүүгийн дэмжлэгтэйгээр байгуулж байгаа бөгөөд Хөххотын Металлургийн
хүрээлэн, ШУА-ийн Хими, химийн технологийн хүрээлэнгийн эрдэмтэн
судлаачид хамтран судалгааны ажил хийж гүйцэтгэх юм. Лаборатори
хүдрийг буталж нунтаглахаас эхлээд, олон төрлийн аргаар баяжуулах, уусгах технологийн
туршилт, судалгаа хийх иж бүрэн багаж, тоног төхөөрөмжөөр тоноглогдсон.
Эрдэс түүхий эдийн боловсруулалтын хамтарсан лаборатори байгуулагдсанаар алт, мөнгө, зэс, төмөр, газрын ховор элемент, нүүрс гэх мэт Монгол орны эрдэс түүхий эдийг баяжуулах, боловсруулах судалгааг эх орондоо цогцоор нь, хил гаалиар дээж гаргахаас эхлээд үүсдэг бэрхшээл, хүндрэлгүйгээр хийх боломж бүрдлээ. Мөн түүнчлэн гадаад улс оронд их зардлаар хийлгэдэг технологи туршилтыг монголд хоёр орны өндөр мэргэшсэн мэргэжилтнүүд хамтран гүйцэтгэнэ.
.JPG?w=1000)
